新釗記 (已結業)

師傅都話粥水唔頂肚, 話咁快未到五點已經餓到半死咁濟, 於是一放監就即刻四圍去搵野食! 行行下黎左呢頭, 師傅見從來都冇黎呢間食店食野, 決定一試!入到去坐底, 唔算多人, 可能係下午茶時段嘅關係; 唔理咁多, 即刻睇下有咩食, 趁住仲係六點前, 所以師傅柯打左個粉麵餐, 要左炸醬麵同埋凍檸茶!等左一陣炸醬麵同凍檸茶一齊擺左喺師傅面前, 第一時間師傅先試下個湯先, 湯都幾好味, 但胡椒味重少少; 再睇下個炸醬麵, 賣相幾靚幾吸引, 有幾條菜仔, 而菜都幾嫩幾甜, 唔差; 炸醬酸酸辣辣, 惹人好感, 加上肉絲唔會太硬, 好好味; 而麵底又係出色, 冇鹼水, 加上煮得煙煙韌韌, 好爽口, 口感一流, 正呀! 而凍檸茶就不過不失, 可以接受! 總括黎講以炸醬麵嘅質素黎講一d都唔失禮, 而服務一般, 地方光猛乾淨, 而價錢都可以接受, 廿八蚊一個麵餐, 凍飲加兩蚊, 都算抵食! 師傅覺得呢間食店嘅質素都應該唔差, 地址又方便就腳, 所以冇咩理由師傅會係第一位留食評嘅呢? 既然係首個食評, 加上質素唔差, 師傅就比首個笑臉, 等佢旗開得勝啦! 下次都會再黎, 皆因好想試下佢d炒野!