塚田農場 (已結業)

沙田新城市廣場底層嘅呢間塚田農場成日都咁多人圍住門口，今次同朋友入咗去食～～最出名嘅係美人鍋，差唔多枱枱客都有一鍋食緊，本來打算叫其他鍋湯底再加小食，最後都係決定食返美人鍋，因為黃金骨膠原雞湯好吸引，睇個名就覺得滋補～～湯底上枱果然無失望，啫喱狀雞湯，睇住佢溶好正，而且仲好香，奶白色湯滾起後，忍唔住飲咗幾啖，好鮮甜～火鍋配料有幾件雞同幾粒手打丸同大量蔬菜，夠晒健康！雞肉配雞湯，雞肉嫩滑又有彈性，手打丸爽彈，幾好～另外，叫咗個小食，蝦牛油果美人紙卷，幾fresh,配搭幾好，係一個開胃菜～最後，食埋個甜品，梳乎厘玉子燒，賣相相當吸引，雖然鰻魚餡比較細份，但成個蛋整得好滑溜，趁熱食正！