養心麵 (已結業)

外地工幹了整個星期後，回到公司實在非常忙碌，但OT都總要食飯，要食得快亦唔代表求其。早幾日去過養心殿打邊爐質素唔錯，而姊妹店養心麵專食車仔麵應該亦有咁上下質素，就一於與同事快閃去養心麵食車仔麵，再回公司OT。以車仔麵舖頭來說，這裏算是非常光鮮，座位亦都算闊落。首先選好想食的食物，然後出去櫃枱比錢，比錢後就可以安坐座位等員工叫號碼，然後員工就會送上食物到座位，非常方便。我叫了一碗辣汁陳皮魚旦，辣味牛筋台式寛粉條配上麻辣醬汁及麻辣湯底。麻辣湯底有層次配上吸味的寛粉條，實在太美妙；辣汁陳皮魚旦，咖喱味香濃，而且好意外地竟然有8粒咁多，好滿足；辣味牛筋，炆得入味軟淋，骨膠原豐富，而且亦有4、5件咁多，好滿足。另外叫了一碗秘製牛筋腩，台式滷水大腸河粉配上美人湯。我試了幾口湯，感覺湯底足料，有骨膠原感覺，唔知會唔會好像養心殿的美人湯底般用上桃膠餚製。同事亦分享了一些牛腩及大腸給我，牛腩亦都炆得入味軟淋；滷水大腸肥美，而且軟淋入味，味道不錯。另外叫了一份藥膳燉排骨湯飯，我亦試了幾口，排骨炆得入味軟淋；藥膳湯濃郁，像馬來西亞肉骨茶般，越飲就越想飲，真係好足料。