STARZ WINE BAR (已結業)

入到東涌睇戲，趕時間9個字搞掂個晚餐，求其揀一間醫肚就算。見到呢間餐廳出面既坐位差唔多full哂，大部份人都係飲酒吹水多，個樣好似幾得咁就坐底叫野食。要左一杯 Stella ，一杯凍既柚子蜜，一個焗薯皮同一個 carbonara。Stella 正正常常，用凍既 Stella 杯裝住。凍柚子蜜就超大杯，真係俾人坐好耐吹水，d冰都唔會溶哂。到野食，焗薯皮既份量真係好少，食過咁多間餐廳，未試過食咁小份量既焗薯皮，得一個，切開左做一半。酸忌廉好正常，薯皮上既肉醬亦都係好好味，無奈最重要既薯仔竟然係未熟既，粉粉地，趕時間既我地都無叫人換過另一份，照食就算。到carbonara，我食左咁多次carbonara，第一次係見到有熟左既蛋白塊結成一舊舊痴住d意粉，賣相非常唔得！雖然好香，但食落去既口感唔同左，無咩食慾，唯有落芝士粉補救，但食左一半就食唔落去，令我諗起眼闊肚窄個廣告，我唔係想做大哂鬼架。