MOS Burger (已結業)

幾年前喺台北幫襯過一次，印象中都唔差。都唔知原來香港經已開咗咁多間。上星期六收工嚟幫襯，一上扶手梯見到排晒長龍咁，真係誇張。食個包咋？同上年年尾去burger king有得揮。真係估唔到食快餐都要等位，仲快乜鬼嘢餐…嚟到都要食架啦，條隊長得嚟都好快排到入去，因為啲哥哥仔都好快手。感覺上個個都好後生同有禮貌。不過我聽到排我前面嗰個問有冇照燒牛肉珍珠堡（因為海報上面冇），其中一個職員話得apm有，結果我去到cashier再問另一個職員，佢又話有。除咗個珍珠堡我仲要咗cheese burger，兩個都係set A，即係加薯條同汽水。其中一個加一蚊加大汽水，另一個加五蚊轉抹茶牛奶。珍珠堡還可以，不過啲飯唔夠燶，食落唔香。但味道唔錯。cheese burger塊肉當然靚過麥當勞，汁亦唔錯，塊包都應該有煎過，但係塊芝士就令人失望啲，如果可以grill一grill溶少少咁就一流。抹茶牛奶好味，唔使加糖都得，同喺日本買嚟飲嗰啲一樣味。舖位唔得，如果係大間啲舖坐得舒服啲我會多啲幫襯。