養心殿台式養生鍋 (已結業)

個個都係養心殿打邊爐，你估個個都想打邊爐嘅咩? 我就係要試下佢啲午飯餐。餐廳陰陰暗暗，好多間隔板，好有私人空間。跟餐送嘢飲，揀咗杞子菊花蜜走冰，甜甜菊花味。女朋友揀咗烏梅汁，酸酸甜甜好開胃。招牌極品台北牛肉麵($78)。有七塊牛，幼麵。份量好大，一定夠飽。上面有啲乾蒜，湯底得個鹹味冇牛肉味或者中藥味。唔係我鍾意嘅湯底類型。配菜有酸菜，菜脯，豆干，可以隨自己喜愛加落主食果度。燉湯食到有人參味，有烏雞，杞子。藥燉排骨配白飯($78)。個飯等咗20分鐘先至有，女朋友都食咗半碗牛肉麵喇。燉排骨個湯好甜，有好多舊排骨，仲有好多塊淮山。飯唔會太乾太硬，唔錯。需要改進嘅係，牙籤如果唔係膠會更環保。