日日香鵝肉飯店 (淘大商場2期) (已結業)

最近呢間日日香鵝肉飯店開多咗好多分店，今日過嚟淘大攞啲嘢俾朋友，所以就約咗嚟呢度嚟試吓。原來呢間日日香係專賣獅頭鵝，記得阿媽講過獅頭鵝係貴好多，今日有機會試吓有咩唔同。二人套餐相對地抵食又夠豐富，所以我哋就揀咗A餐。原盅老火燉湯憑着佢嘅顏色已經睇得出真材實料。入面有烏雞、桂圓、蟲草花煲瘦肉，非常滋補又夠養顏。招牌鵝肉雖然只係例牌，但份量一啲都唔少，而且佢嘅肉質真係特別香同滑，肥瘦適中，再加埋下面有少量豆卜，配合佢嘅滷水汁真係特別好食。雖然我覺得原汁原味就已經夠好食，但枱上面仍會放着醋同滷水汁，鍾意濃味啲嘅可以再自行調味。餐廳內嘅電視仲會播放住建議食法，跟住佢食就更加食得出潮州風味。套餐可以自選兩款小食，我哋就揀咗豬手同豬腩肉，豬手切成厚片，令口感更佳；而腩肉嘅選材肥瘦分明，加上用滷水烹調後令腩肉變得更加鮮味。白灼生菜亦都加咗滷水汁，味道唔會太寡亦唔會過鹹。滷水鵝就一定要配白飯，真係忍唔住清晒成碗飯！