指定動作 - 先叫盤刺身食下先, 款式夠多, 大路如三文魚, 帶子, 甜蝦, 吞拿魚呢D一定有, 連鼻拔蚌都有, 真係夠驚喜! 擺盤吸引, 食落唔會仲係冰感, 一啖一件真係夠爽快!
呢度除左任飲汽水果汁外, 仲有酒類提供, 我更唔客氣啦, 叫返壺梅酒慢慢嘆!
飲緊杯甜美梅酒時, 精緻壽司已經送到黎! 賣相絶對唔輸蝕比壽司店出品, 飯粒軟硬度適中, 又唔會太大舊, 試多幾款都唔會"質"飽個肚! 每款以件計, 可以黎個自家製壽司拼盤!
清酒煮蜆, 湯底好重酒香味, 蜆肉無沙, 清清地之選!
呢度有提供蒸氣鍋, 係食緊其他食物嘅同時可以蒸埋, 食材由海鮮, 鷄肉, 牛肉, 豬肉, 菇類至蔬菜都有, 各色其式! 個咀真係無時停呀, 食盡佢90分鐘呀!
可能有人認為係放題入邊食粥係一件傻事, 但呢度嘅響螺蟹粥確實係幾好味喎, 粥底綿滑食到鮮味, 蟹雖然細細仔但肉都算鮮甜, 唔會比埋D死貨你!
燒菠蘿每件厚切, 肉厚甜美多汁, 不禁叫完再叫!
炸物時間出場啦, 天婦羅炸漿唔厚, 唔怕食到一口粉都未食到主角真身, 全部熱辣辣又唔油膩, 點埋個天婦羅汁就仲GOOD!
炸物停不了, 又係我至愛嘅芝士年糕及香芋丸出場, 每次黎都一定要食, 炸至外脆內軟, 又香又甜, 叫人點忍得住口喎!
呢度仲有甜品如360奶凍, 布甸, 雪糕杯及雪米糍, 超滿足地埋單走人呀!!
