位置都幾方便，係行人專用區果頭，不過食飯時間就要等一陣𨋢上去。
上到去等位大約等咗十分鐘，一入去就見到好多日本嘅達摩掛咗係到做裝飾，好過癮！
首先我地先叫個近年好hit嘅蒸氣海鮮，有2層海鮮+1層雞粥。我最鍾意個蠔同埋扇貝，好甜好鮮味！食完海鮮再食最底層個粥，雞粥d雞好滑，粥底唔夠綿但係滲咗d蠔汁落去味道都幾好。
然後我地就order咗d刺身、串燒、壽司同埋最重要嘅打邊爐湯底！刺身都幾新鮮而且有我最愛嘅油甘魚食，不過三文魚同八爪魚刺身就相對上出色d。雞翼串燒佢燒得好好，（出去拎嘢食會見到師傅係企係到跟單即燒嘅）雞翼皮脆，雞肉唔會過熟，不過如果再加少少黑椒就更加好。壽司其實都好多款，但係由於我地太多女仔，怕食太多壽司就食唔落其他，所以剩係叫咗兩款。佢個芝士鰻魚卷整得幾好食。
食完第一輪，我地就叫牛肉同豬肉打邊爐（任點），牛同豬佢都切得好薄，好快就熟，而且肉質都幾好
我地都一人食咗一碟牛。
但係好戲在後頭，呢間餐廳最令我驚喜嘅係佢d自助甜品，款式好多，而且味道好好。有好多款朱古力味甜品，o岩晒我。我覺得其中最好味就係水玄信餅、布朗尼同朱古力慕絲（好少食到3重口感嘅朱古力慕絲，超級推介）。仲有朱古力牛奶雪條（我都好耐無食過，勁懷念）
以任食日式火鍋嚟講，呢間更加接近日式放題，樣樣都有得食，選擇都算多，又唔係貴，都幾值得再嚟。
