2DP (已結業)

最近食太多肉，想食素清淡啲。約左朋友黎尖沙咀，搵到呢間新派走西式路線既素食👍🏻我地點左個泰式肉碎生菜包伴青檸汁、燒烤醬墨西哥素肉碎薄餅、原個南瓜盅忌廉大麥飯、黑杞子蜜糖黃菊同烏龍泡沫奶茶。泰式肉碎生菜包用左啲冬菇月素肉碎炒埋一齊，食落似冬菇肉餅，味道唔多泰式，係點左啲青檸汁先似返少少，期望過高。燒烤醬墨西哥素肉碎薄餅真係超薄脆！我諗我可以食成個！勁香，好好味！有啲黃色同紅色既車厘茄，非常juicy！只係少少辣，唔食得辣既人都食得到。上面既肉碎好食過生菜包。原個南瓜盅忌廉大麥飯好有睇頭！唔只睇得重好好食！用左本地南瓜，面頭一條條個啲係炸天使麵，大麥飯帶點煙煙韌韌，加埋甜甜地既南瓜粒、蘆筍同南瓜忌廉一齊食，食唔停口！我地食到中段先發現原來個南瓜啲肉係無被起出黎，就起勢刮黎食！好甜好好味🤤🤤🤤連埋啲南瓜咁食法，真係好飽，多都食唔晒，建議三至四人分享。黑杞子蜜糖黃菊無得走甜，不過唔係好甜，有淡淡既菊蜜味。朋友既烏龍泡沫奶茶，佢話唔鍾意上面啲桂花，下次要叫走桂花。