悠蔬食 (渣甸中心) (已結業)

第一次去係二月嘅時候，滿心期待，嗰次同男友去到，坐門口對出嘅二人枱！隔離坐咗一枱人！雖然好嘈，坐得好唔舒適，但食物我地覺得味道唔錯！好鐘意紅咖哩候頭菇薄餅加飯！好好味！飲品都好好飲！今次朋友book咗2010，點知2005去到最後又要等到2030先可以坐低，一坐底又係好嘈！嘈到好似茶樓咁！睇下食乜！晚市得好少選擇！叫番好鐘意嘅紅咖哩侯頭菇薄餠飯，可能食第二次，感覺冇第一次咁好味，候頭菇仲要得兩粒！由於我地三個，其中一個唔食黑松露，少少味已經好反感，而我同另一個朋友好想食嗰個黑松露薯蓉焗咖啡菇，於是問侍應可唔可以其中一個唔落黑松露！結果唔可以，解釋因為佢地係下午已經準備好D材料，已一早放入去。我地好失望，但由於太想食，照叫左，唔食黑松露朋友嘗試慢慢由邊食起，結果佢食曬成個，佢話根本食唔到黑松露！我地兩個都唔係好食到有味。總括食物ok但環境細地方窄好嘈，真係好影響！可能晩市多人！如果三五知己喜歡靜，傾下計食野，唔建議去依度食晚飯。