神經餵飼 (已結業)

幫襯左呢間小店已經有一段時間，今次寫食評裏便嘅嘢食可能而家已經轉左但係我都想喺度支持下呢一間餐廳☺️今日約咗中學同學食飯，因為佢住喺旺角太子呢一邊，所以就嚟咗神經餵飼呢一間餐廳。呢間餐廳有兩層，地面就係坐嘅枱櫈，2樓就係好友文清feel嘅環境係坐地下嘅，我哋就選擇咗坐2樓因為感覺自由同埋光猛啲舒服啲，如果着裙嘅女仔就唔好揀坐2樓啦🙈我哋諗左好耐，因為每樣嘢食都好吸引，最後揀咗呢三款嘢食。😝第一樣係-煙三文魚蘋果熱情果沙律，依一個沙律材料配搭幾好，有酸酸甜甜嘅青蘋果同埋熱情果，當佢係頭盤咁食好開胃，三文魚嘅份量亦都啱啱好，唔太多，唔會太少，唔會太滯。🤗之後嘅係黑松露野菌菇菇飯，呢個飯材料都幾充足有好多唔同嘅菇，啱晒我呢啲最鍾意食新鮮菇菌類嘅人，佢係好似燴飯樣嘅煮法，飯嘅軟硬度啱啱好，唔會太硬亦都唔會太淋，忌廉嘅份量亦都恰到好處。😋唯一唔好嘅係賣相有少少凌亂。🙈最後嗰樣唔記得左叫咩名，有燒鯖魚同埋吞拿魚魚腩蓉配飯、仲有舊豆腐添。呢一樣唔算突出，個人認為配搭唔係好好，似幾樣唔啦間嘅嘢擺埋一齊。不過味道係唔錯嘅🤣。總括嚟講，呢間小店嘅食物價錢同埋質素都係唔錯嘅，所以我間中喺呢頭嘅話都會過嚟幫襯😜