影片
更多
2017-10-02
177 瀏覽
一直冇食評的習慣，今餐亦都冇打算寫，純粹朋友聚會，食物相都冇影過。但係從來唔寫食評既我，都忍唔住喺度吐吐苦水。普通朋友飯聚，見呢間餐廳好評多，位置方便，又有得訂枱，於是扑搥就呢間啦！喺OPENRICE訂咗6點半，訂座頁面或者入座時從來冇提及過有交枱時間。6點半準時到餐廳門口，企咗幾分鐘都冇人理我地，期間有店員經過同埋帶其餘客人入座，但都冇問過我地幾位或者有冇訂座。算啦，行入去問，即刻有侍應帶我地入座。坐低唔到一分鐘，阿仔同我講有水滴落唻，原來係上面既冷氣滴水。作為一間餐廳，呢一點係咪要改善下呢？如果滴水咁啱滴咗落客人碟嘢食咁點算？好啦，開始點餐，我地點個4人餐，因為其中一個人未到，所以同侍應講先叫3 份前菜，個侍應既反應好似從未試過有客人咁樣落單，面有難色咗成分鐘。要咗2個要沙律1個要湯，轉頭送咗3個沙律唻，就同個侍應講送錯咗，叫佢換返一個做湯。幾分鐘之後，侍應拎住2碗湯過唻，又要解多次話，話其中一份等朋友唻到先決定。朋友唻到之後又再解說多一次先至成功拎到最後一份前菜。主菜方面，揀咗千島海鮮pizza、T 骨牛扒、白汁天使麵同埋黑松露芝士野菌意大利飯，再加咗$48要小食拼盤。上菜速度慢
普通朋友飯聚，見呢間餐廳好評多，位置方便，又有得訂枱，於是扑搥就呢間啦！喺OPENRICE訂咗6點半，訂座頁面或者入座時從來冇提及過有交枱時間。
6點半準時到餐廳門口，企咗幾分鐘都冇人理我地，期間有店員經過同埋帶其餘客人入座，但都冇問過我地幾位或者有冇訂座。算啦，行入去問，即刻有侍應帶我地入座。
坐低唔到一分鐘，阿仔同我講有水滴落唻，原來係上面既冷氣滴水。作為一間餐廳，呢一點係咪要改善下呢？如果滴水咁啱滴咗落客人碟嘢食咁點算？
好啦，開始點餐，我地點個4人餐，因為其中一個人未到，所以同侍應講先叫3 份前菜，個侍應既反應好似從未試過有客人咁樣落單，面有難色咗成分鐘。要咗2個要沙律1個要湯，轉頭送咗3個沙律唻，就同個侍應講送錯咗，叫佢換返一個做湯。幾分鐘之後，侍應拎住2碗湯過唻，又要解多次話，話其中一份等朋友唻到先決定。朋友唻到之後又再解說多一次先至成功拎到最後一份前菜。
主菜方面，揀咗千島海鮮pizza、T 骨牛扒、白汁天使麵同埋黑松露芝士野菌意大利飯，再加咗$48要小食拼盤。上菜速度慢，唔單只主菜，連餐飲同雪糕都要等好耐。
Pizza，油淋淋到阿媽都唔認得，從來未食過一件pizza 會漏到我全手都係油。
T骨扒，叫咗7成熟，切開既時候好明顯係全熟，同o趙膠冇乜分別。意粉口感更奇怪，主要原因係未煮熟。
天使麵同樣未煮熟，硬過我條命，用叉挑起既時候見到天使麵同一個頭箍冇分別。
黑松露意大利飯屬於最正常嗰樣，味道總算不過不失。
服務態度方面，侍應主動性唔夠，觀察力亦不佳，每次要加水都要客人主動開聲，過份既係2次我開口叫加水，侍應都冇幫我朋友嗰杯加埋，到底係佢覺得少半杯水仲有得飲唔洗加吖，定係真係睇唔到？
食到咁上下，叫餐飲，呢頭侍應A幫我落完單，唔到一分鐘，侍應B走埋唻話：你地個4人餐有4杯餐飲……
加咗每杯10幾蚊轉做咖啡，唻到嗰杯iced mocha，淡過水，成杯都唔知咩唻既。
最後上雪糕，阿仔無啦啦問我：媽咪，你杯雪糕係咪硬架？
原來阿仔杯雲尼拿雪糕融曬變曬泡既，點解咁樣都可以拎出唻俾客人既呢？
最後，有侍應走過話要埋單，大家仲食緊雪糕，冇特別理會，由得張單放咗喺枱邊，5分鐘以內先後有2個侍應埋唻想收錢，我地話未得，侍應就話夠鐘交枱。朋友選擇簽咭，等緊碌咭期間又有侍應過唻催我地走，話原本8點已經要交枱，但嗰陣已經8點10分。過咗大約10分鐘先至拎張單埋唻俾我地簽，不過算佢地精，呢段時間內都冇再埋唻催我地，如咪燥燥地真係會鬧爆佢地，我張咭仲喺你手，你叫我走？冇嘢呀？
開頭都已經講咗，佢地係從來冇同我地講過有交枱時間。另一方面，佢地openrice訂座頁面寫住6:30嗰輪係有85折，但係臨確認訂座先會見到係寫明"7:30前離座"先享有此優惠。試問你地咁既上菜速度，係咪真係有人趕得切6點半入座、7點半離座呢？
總之一句，呢間嘢，冇下次，永久blacklist.
張貼