小娘惹 (已結業)

今日lunch time朋友帶我嚟食小娘惹，一見門面有特別設計，油到粉紅色好colourful，已經感受到好有馬來西亞感覺。坐低後，先發現好彩早咗嚟，事關門口已經有好多人排隊！同朋友一樣，點咗海鮮喇沙麵！好耐無喺香港食過咁濃味嘅喇沙麵。一般喇沙麵有兩個死症，一係辣味蓋過鮮甜，一係溝得太多水無咩味，而呢碗麵正正係唔辣得嚟得嚟又濃郁嘅湯底。而且值得一讚係，溫度控制得啱啱好，而喇沙麵係用兩種唔同嘅麵溝埋而成，加上配料十足唔慳功夫，70蚊係值得嘅。不過老闆娘嘅態度就令暖意大打折扣。本身同朋友討論喇沙麵會唔會好辣，朋友話唔會。本住求證嘅心問多次老闆娘，但回應係：你朋友咪講咗囉，你唔信佢架？老闆娘不慍不火嘅反擊，的確有啲哽耳，雖然佢氣質仍然係好斯文溫和。總括嚟講，食物都係好食嘅。