韓舍 (已結業)

上星期日同媽咪去呢度食自助餐，食物一次比一次好，式亦都比以前多，最鍾意係雪耳蛋花糖水(因為我鍾意食糖水嘛！)之不過今次D侍應服務就冇以前咁好啦！第一，黑面神侍應。果個侍應唔坐上神檯扮關帝簡直浪費人才，次次離親收碟，面色黑到好似我地一家人殺左佢全家咁，大佬，我離食野姐，唔洗咁下話。第二，唔識添水。因為係韓燒加火鍋，有時真係要麻煩侍應小姐們幫下手添水(會煲乾架嘛)，但行到埋離望望，見D水煲到所餘無幾都唔識做既，要叫先識，係唔醒定係乜呀！第三，提早埋單。講明先，叫埋單果個唔係我地，而係班侍應，佢一早同我地講，如果有人等位既話，我地就只可以食兩小時，如果冇人等，就可以坐耐D，OK，你話點咪點囉，後來個侍應同我地講，而家開始有人等位啦，你地可以坐到7點50分(佢同我地講呢番話時正值7點15分)，過冇耐，我地聽到：「多謝343元呀！」哇，驚死我地坐過時咩，咁早離收錢，埋單又咁落力，其他又唔見做得咁好，結果我一蚊貼士都唔比，佢塊面更黑，黑咪黑，驚你呀？唉~~呢間野如果唔算D 侍應在內，在新界區質數都算係咁既。