芝脆雞 (已結業)

又係我啦，唔知點解呢排阿媽成日唔煮飯，咁我又乘機黎呢度開飯啦。又係叫個$30SET，今次飯係金CORN雞焗飯，湯係磨姑湯，加件炸雞。原本諗住外賣，但見果日無咩人，幾靜就轉左堂食，點知話口未完，兩個太太帶住一班細路入了來，全部幾歲大，人未到聲先到，原本靜的環境立時熱鬧非常。加上佢地坐正係我隔離，果度D台與台之間又窄，係佢地標來標去之際就經常性地撞落我張台度，搞到我碗湯如遇上8號風球般，搖來搖去，之後終於要發生的發生了，D細路終於打瀉汽水，靜了一會，兩秒後又即嘈過，你話我打瀉，我話你打瀉，ETC.......係如斯環境下，想改拿走，D野又咁ARM來了，唯有快食走人啦，真係唔知今次係無之前咁好食定環境影響，我覺D件雞係就係即炸起，好熱好脆，但有陣幾強勁的雪味，一般。至於個飯，D汁好稀，又無咩味，肉又少，好好一般。湯就普通過唔普通的磨姑湯，我只飲了一半，上次個薯仔湯好飲好多。就係咁我拿拿臨食完拿拿臨走人，當然我都知快餐店係會嘈，但坐正係班超級嘩鬼隔離又真係......所以下次見唔對路都係外賣好D，可能咁會食得滋味D。