DK1885 (已結業)

尋日我同老婆兩個係灣仔揾食，行過小街見到呢間北越野，人唔多而且亦幾肚餓了，就入左去試下。我地唔多大食，同一般都中意食海鮮，所以就叫左個海鮮粉兩份分加個龍躉做餸。老婆再點左個雪啡奶試下。一點雪啡奶同龍躉(唔記得全名🙇)，老板娘就話我地識貨。雪啡奶冇乜地方飲得到，咖啡味香濃，而且有奶果種好smooth嘅口感。龍躉魚係一個煲，有五片好厚嘅龍躉，加左啲青蔥之類煮。龍躉煮得好鮮，煮得啱啱好，口感彈牙又唔老。啲配菜同魚都煮得好香好入味，所以我地食得幹幹淨淨😋仲有個蟹肉海鮮粉，好多蟹肉，仲有蝦同BB青口。湯底係十足料嘅海鮮湯，冇味精feel。BB青口同平時食嘅青口好唔同，平時青口都係“鞋”身嘅，不過BB青口非常嫩同時好冇青口味。所有菜式都好出色，處理得好好，而且份量好“扎實”。兩個人$320落樓，食到咁出色嘅海鮮真係意想不到。我地都覺得老板娘太有良心，咁做生意怕佢好難賺，唔想佢咁出色嘅北越餐廳做唔到落去，所以我地都叫佢唔洗咁”扎實“，等我地叫多兩個餸食下啦😄真心推介！為左幫佢宣傳下，我平時唔寫食評嘅都黎寫下宣傳下啦。