碌冧法式越南料理 (已結業)

呢日上來雅蘭中心幫襯，見呢間未試過，入來一試，睇睇好唔好食，結果......1）鮮蝦酸湯：細細一碗湯，只得兩隻蝦，收成$30，味道係幾開胃，不過唔係咁抵囉。2）香露雞翼紅飯：份量少得驚人，雞翼都有四隻，唔算太少，但係d飯就......加埋都唔知有冇兩大碗，兩個人食邊度飽呀！D飯得個紅字，同普通白飯味道一d分別都無，仲話係廚師推介添！3）魚醬炒時菜（西蘭花）：算係好d。4）薄餅伴咖喱汁：因為食得唔夠飽而叫的薄餅，味道反而有驚喜，咖喱汁夠辣，加埋薄餅夠熱，係全晚最好味嘅。5）椰汁黑糯米：都係因為食唔飽而叫嘅，份量ok，不過實在太甜啦，應該淡番d好食d。食完五樣嘢落肚，埋單差唔多成$200，都要唔夠一陣就肚餓，都算少見，就算幾好食都係假啦！順帶一提，呢度嘅部長服務態度唔係咁好，問佢嘢嘅時候好似好唔情願咁，食完開頭三樣，見未飽叫多兩樣，d侍應又問都唔問擒擒青收嘢，個人覺得都係要改善一下囉。