富園海鮮飯店 (已結業)

阿爸生日飯，飯局地點左唸右唸，最終決定到此食晚飯。7:15pm人齊，7:30pm叫上菜，7:45pm未見上菜，8:00pm仲未有得食(係一樣餸都無)。附近兩檯差唔多時間一齊坐低，都差唔多上晒菜起勢咁食。催兩次最後8:10pm開始食，個個已經個樣變左似阿呆，O晒咀反晒白眼。原本落Order，兩檯人，一圍10人，一圍8人，都係唸住食平價餐。但職員不斷進行游說，又話平價餐無翅無斑，叫我地食$19xx餐，我地話人數唔多食唔晒，佢就話減百幾蚊，餸份量減少就人數。最後達成協議，成交！上菜程序比較混亂唔協調，飯同雞中途已經殺到，但係食海鮮，又要剝殼又要"損"，仲邊得閒食飯同雞？結果飯就由中途擺到變尾段，又硬又乾！部份海鮮尾段上，個個都差唔多飽晒，見到都無胃口再食。上菜速度時快時慢，初時等食，中段及尾段開始要密密食，唔係食物無位擺。8:10pm開始食，9pm已經上晒菜食完，但由於無電視睇無麻雀打，9:15pm大家都打道回府。整體上，食物質素都不賴，可以任飲啤酒橙汁、食白飯，仲有海鮮，以呢個價，都平過西貢。但論服務、環境就真係一般，亦係致命傷。去過一次，都未必介紹朋友去。