吉豚屋吉列豬扒專門店 (已結業)

香港由幾時開始冬天落雨嘅呢。。。無記錯當年教科書上寫嘅係春天夏天落雨的。。。冬天落雨，又濕又凍，唔想周圍走，但就又想食野，難得兩日假冇理由留喺屋企架，於是就上網搵野食喇。我好耐之前已經想去捐血，但南非艾滋病咁厲害嘅地方令我好有心理壓力所以一直冇去，返到黎香港當然要去啦，為己為人嘛，我一向覺得女人每個月都流血係例行公事，流完血之後身體就會造新嘅血，總覺得身體上有新嘅血會健康啲，所以難得放假，今日一定要去，但去邊間呢？出去就想食野，所以一定要搵間就腳嘅，我宜家住喺彩德邨，一係去旺角，一係去APM。。。就去APM啦！（唔好意思浪費大家睇食評嘅時間，但捐血哩種利己利人嘅事，喺身體狀況容許嘅情況下應該支持的😊）APM喺嗰邊，就行過去九龍灣地鐵站啦，嗰邊食邊間好呢。。。查下Openrice附近有咩好野食先。。。就佢啦！😁

淘大商場。。。行入去。。。穿過去。。。露天廣場。。。左望右望。。。行到另外一邊角落。。。終於搵到了😝

一入門就聽到店員門用日文為我講句【歡迎光臨】了，突然覺得自己好受歡迎，哈哈😁 店員問我幾個人，我一個啊，就帶我埋位了，坐入卡位嘅一角，位置足夠，坐得都算舒服吖～ 睇下餐牌先，我懷疑我有選擇困難，好彩一心黎哩度食炸豬扒，所以唔使浪費咁多時間😚 店員大姐就喺我啱啱決定好嘅時候走過黎，實在太好了😊就要【吉列炸蝦豬扒定食】啦～

好，真係啱啱點完餐，攞起部電話，開咗Whatsapp，打唔夠幾句，我點嘅野就上檯了，真係唔知係咪好事。。。。。。

食野～ 咬啖炸豬扒先。。。表面唔係好脆，亦唔係好軟，入面豬扒鬆鬆的，食落感覺ok啦，要求唔好太高，快餐而已，份餐上得咁快，唔太熱係預料之中了😌

再夾件蝦，點啲沙律醬，咬咬，就如我啱啱講嘅，快餐而已，唔好預隻蝦會又大又鮮，口感ok就已經收貨的了😜，再夾一件，再點點。。。。。。都未食完一半，嗰碟細細碟嘅沙律醬就已經俾我點完，見到旁邊有燒汁就加啲落豬扒度啦，試下先。。。味道又ok喔，但食炸蝦我比較中意配Mayonnaise囉，份Mayonnaise真係有啲小氣😁 我見啲店員各有各忙，啲燒汁老實味道又ok，我人又比較隨便，所以冇叫店員大姐幫我添加，但我會提議食友們如果覺得有需要就唔好客氣喇。。。

攞起支dressing加落啲椰菜度先～ 食食，ok啊，口感啱啱好，夠脆，又唔係太脆（我講緊啲乜😁），同dressing嘅味道配合起黎，食落都算舒服吖。

麵豉湯就冇乜特別，大眾味道唔難飲，成本又唔高，食日式定食冇返碗就好似差啲乜咁😊

食啲蝦食啲豬扒食啲飯飲啲湯，食到最後發現。。。剩返大半碗白飯同湯。。。有問題的，但唔知點講，唔食埋一黎浪費（自細阿婆教落，食物要完全食曬，粒粒皆辛苦呀！），二黎唔夠飽，就將啲湯加埋落啲飯度食埋佢，就如之前講的，啲湯味道ok的，所以味道還是唔錯的😁

好喇，食完，7成飽，份量還可以，埋單走人，整體而言，哩餐算係食得滿足的，每樣食物水平都唔差，食完感覺就好似食完【大快活】咁，食得舒服但唔會有咩興奮或者激動嘅感覺囉，OK啦

1

同食完【大快活】嘅感覺一樣，樣樣對板，食完舒服，但唔會有激動或者興奮感覺囉