牛大人台灣火鍋吃到飽 (瓊華中心) (已搬遷) 新店位置

呢間火鍋放題最近真係好hit，分店越開越多，邊爐控嘅我當然要試試！估唔到5點去到都坐滿晒，今次就試咗最貴果set極上和牛吃到飽套餐，可以試齊所有食物，仲會送每位兩粒澳洲和牛牛丸，牛丸超juicy！今次我地揀咗麻辣鍋，小辣都夠食。試勻所有牛肉都唔錯，雪花分佈平均而且都好淋滑，但澳洲和牛m5牛肩卷就特別有肉味！除咗主打肉類，我仲特別食啲平時台灣先有嘅食物，例如麻辣鴨血，呢度啲鴨血係似台灣嘅比較厚身，食落入味又嫩滑！米血糕香軟粘糯，口感風味都係台灣獨有。水蓮菜係必食，滾水淥幾下就食得，超級爽脆又清甜。如果食麻辣湯底，推介大家一定要試王子麵，麵條比較幼身，有啲似福麵，王子麵索晒麻辣湯汁係絕配！打邊爐最緊要飲返杯，難得呢度有手工啤「流水落花」又幾易入口，有淡淡嘅麥味。雖然餐牌本身已經有好多選擇，但原來自助區仲有一大堆配料、蔬菜同麵條，仲有好多飲品可以揀，應有盡有，黎之前個胃真係要好好狀態至得！最後食返杯movenpick雪糕做甜品，二百幾蚊人頭黎講，真係好豐富好滿足！