輝煌樓海鮮酒家 (已結業)

去開油麻地順便上嚟輝煌樓食個晚飯 ，見佢有火鍋同小菜 ，因為小菜有優惠五個揀一個， 所以我同朋友就叫咗小菜食，總共叫咗三個小菜。优惠嗰個叫咗片皮鴨，另外叫咗一個龍躉頭腩炆茄子， 原先兩個都好夠食，不過見到隔離枱，碟叉燒好似好靚，所以我哋都叫咗一碟， 價錢都只係48蚊一碟，叉燒雖然係好瘦，但係食落口一啲都唔硬同'鞋拾拾'，肉質好鬆軟，好淋身。個龍躉頭腩炆茄子係用咗新鮮嘅龍躉肉，將啲龍躉切開一塊塊炸好再同茄子一齊炆，魚肉好結實，好新鮮，茄子就炆得好淋，好入味，係一道有水準嘅小菜。片皮鴨係五個優惠之一， 98蚊有一隻，仲有好多蝦片附送埋，真係好抵食，雖然片得唔係好靚仔，不過勝在冇咩肥膏，啲皮又有啲脆， 食落好香口，最重要嘅，係佢啲醬，青瓜同 蔥段都好有份量，食片皮鴨個醬係非常之重要的，如果個醬料同配料唔夠，食片皮鴨就會好dry，好彩呢度都好慷慨，所以食得好痛快。呢餐晚飯仲有免費霸王花湯 ，同埋番薯糖水送，响 市區嘅酒樓食咁多嘢都只係三百幾蚊， 真係好抵食呀！