一鍋瘋 (已結業)

之前見到東張西望介紹呢一間紫薯湯底打邊爐，就覺得好有趣，所以就約咗朋友試下，上OpenRice見到個價錢好似唔貴，海鮮盤＄198一位。點知海鮮唔算太新鮮，已經咁近旺角街市，竟然海鮮都唔新鮮，真係令人失望，象拔蚌有沙嘅，鮑魚亦都唔算非常新鮮，豬肉同牛肉顏色係好色，都唔係咁吸引，亦都一啲都唔嫩滑。個椰子湯底，聞落去有少少香味，但係食落去淡如水。另外仲叫咗粟米湯底，已經算係比較有味道，唔算係水一般嘅淡味。真係未見過啲粟米可以切到薄成咁！打邊爐只有蔥蒜頭辣椒，非常少選擇！全間餐廳只係得兩個侍應，其中一個相信係老闆，但係兩位侍應全程黑面，真係有啲難受，始終都係顧客！枱同枱中間嘅距離又非常之迫，比大X樂仲要迫，聽到隔離枱嘅人嘅說話，隔離枱食蟹鉗嘅時候，由於枱同枱中間嘅距離太近，完全沒有空隙，隔離枱嘅食嘢嘅時候都彈親我塊面。