東昇有機農場餐廳 (已結業)

第一次去呢間餐廳試食有機菜，點知食到一肚子氣...話說有晚駕車入九龍灣想泊喺MegaBox shopping兼食飯，點知MegaBox停車場派長龍要等，咁就唯有去附近嘅國貿泊低架車醫肚啦。差唔多八點，喺商場兜咗一個圈都無咩好選擇，見呢間寫「有機菜」咪試下囉。原先同Honey各人叫一個套餐(每個$48)，但個女待應就hard sell二人套餐$128抵食，見佢咁賣力就順下佢意囉。個套餐包兩款特飲、兩碗菜湯、兩款前菜、兩款主菜、兩碗白飯同生果。過咗兩三分鐘後，個女待應話其中一款主菜(雞)賣哂，要改第二味。等咗十幾分鐘之後嚟咗兩款前菜(土豆絲、拍青瓜)；再等十幾分鐘待應話無特飲，只能改生果汁；再過十分鐘嚟一道主菜….之後就一直等，白飯要催先嚟，等到白飯差唔多食完，就嚟另一道主菜，但兩碗湯一直無送嚟。問待應啦，佢先講話無哂湯，補兩杯生果汁可唔可以？已經飲咗啦，仲嚟生果汁，有冇搞錯呀！我問佢仲有咩選擇，佢話補「兩罐可樂」，諗住攞走都好啦，但之後佢行返嚟又話唔可以揀可樂，改為一碟「沙律」，到佢行返去柜枱之後又返嚟，話只可以補「兩個橙」… 真係火都嚟，一時生果汁，一時可樂，一時沙律，最後變成兩個橙！