芝加哥串燒酒場 (明雲閣)

今日想食串燒，以前係元朗想食串燒通常去又新街坐街，而家元朗多左間串燒場，見佢串燒款式超多，酒既種類都多，坐得又舒服，就去哩間try try鋪頭串燒種類有兩整頁紙，睇左好耐先落到單😂食得串燒梗要啤啤佢，哩到好多手工啤，我地叫左支Little Creatures IPA同Samuel Adams Boston。我地叫左蟶子王、白鱔串、牛油帆立貝、明太子玉子燒、黑啤豬肉腸、雞脾菇 、孜然午餐肉、雞肉軟骨棒、磽燒密椒雞翼串、A5和牛粒、香蒜蔥花廣島蠔同鹽燒多春魚。啲串燒都上得好快，全部都好食。最期待啲海鮮同和牛。蟶子好大隻（最左），燒完仲係好彈牙無縮水！白鱔都係啖啖肉，佢仲配左個燒汁，好味。最出色係個和牛，真係食得出係靚牛，牛味重又香，無筋既，好好食。總體食物質素高，又可以坐得耐，放工chill下一流。