食客可能會話：係肚餓呀！
身在香港，尤其是銅鑼灣嘅旺區，魚蛋、燒賣確係一街都係，但良心小店又有幾多？
早排終於嚟到傳說中嘅渣哥銅鑼灣分店。一嚟到，就見到長長嘅人龍，愈近商店，就見到車仔上嘅食物。
歷劫後翌日，食客繼續風雨中抱緊豉油，一齊繼續支持小店。
今次我地下午三點幾到，剛好復業一陣，我地排左大約十分鐘，相對較快。若然你只求祭五臟廟，呢度嘅人潮確係有機會令你卻步。
留得喺度嘅，都係相中食店嘅人情味。係愛，亦係責任。
原本一心諗住嚟飲樽仔茶，但原來銅鑼灣無供應的。相對德福分店供應健康樽仔茶，呢度嘅飲品相對都係傳統款式，例如汽水等等。
愛好健康飲品嘅讀者可能就需要過海喇。
講返食物，我地今次試左四寶丸、燒賣、魚蛋，配辣蒜蓉汁。愛辣嘅你一定要試！不過，如果你第一次試，強烈建議你叫店員將汁醬放喺盒嘅一邊，否則可能會返唔到轉頭。
食渣哥，滾熱辣嘅魚蛋燒賣係正常發揮，重點往往係佢地嘅醬汁，呢日食嘅辣蒜汁一試難忘，小遺憾就係飲唔到樽仔茶（建議分店喺當眼處賣健康飲品解辣）。
雖然價錢嚟講，筆者未必負擔得到每日都食渣哥，但有機會的話，會再試其他食物。畢竟，單憑愛與責任，不足以讓良心小店永續經營。
香港小店難做，香港良心小店更難做。係愛，係責任，更要交租。若然你遇上一間你好想佢留低嘅小店，即刻去啦！選你所喜愛嘅，一齊風雨中抱緊豉油。
