港囍冰室

去中港城搭船，入閘前醫肚，朝早冇太多選擇，嗰間大家樂又唔係供應正常早餐，咁就盲舂舂咁去咗呢間。
入到去，招呼冇乜問題，都係一般茶餐廳，朝早都人多。諗住都係穩穩陣陣叫咗一般沙嗲牛肉麵，雪菜肉絲米等等茶記嘢食，點知都中伏⋯⋯
唔知係咪選料問題定係煮法問題，啲米粉好鬼死硬，又冇味；沙嗲牛啲牛肉好韌，米粉同麵，無論味道同口感都唔係一般茶餐廳食到！
下次如果唔想食大家樂嘅雲吞麵，我寧願去七仔買個杯麵，都唔敢再試啦！