大和牛石燒專門店 (已結業)

九龍灣德寶商場，呢幾年大翻身，重新裝修過，又開咗好多唔同類型嘅餐廳，其中見到呢間最特別嘅石版燒餐廳，餐牌幾吸引，裝修格局能四正，所以就入去試吓。今日係為咗慶祝朋友生日，兼夾獎勵佢前幾日同我哋行山，挑戰自己，突破成功。餐牌上有好多種類嘅牛肉，日本、美國、澳洲都有，另外亦都有雞肉及豬肉，總之就啱晒食肉獸。仲有如果對漢堡有興趣，仲可以點漢堡餐。日本A5和牛眼蓋$145/100gA五黃牛真係冇得頂，切得薄片，喺石板燒上輕輕煎熟，變色就即刻食得，雪花一樣嘅牛脂肪超級甘香，入口嗰種鮮甜美味，真係無法形容，人間極品！日本大和雞上髀$68/200g大大件嘅雞扒冇骨，擺喺石版燒，睇住雞油煎出嚟，同肉質夾埋嘅香味，真係冇得彈。店家提供唔同嘅醬汁，有燒肉汁、芝麻醬、柚子醋汁等，用嚟點呢個雞，都好啱。雙層芝士和牛漢堡套餐漢堡超級大個，配上美味非常嘅洋蔥圈，仲有飲品，更加大滿足！值得一提嘅係石版燒套餐，提供沙律、餐湯及白飯任食，非常之抵。