華昌粥麵燒腊飯店 (已結業)

幾十蚊，當然不是真響螺，鮑魚亦只是齋鮑。同太座去親戚家睇大長今結局兼打牌，之前食左飯先。天氣開始熱，有點滯滯地，太座想吃粥。在太古城無咩選擇，得這裡好似似樣一點，就來了幫襯。可能真係大長今結局效應，七點零都無咩人，卡位任坐。因為拿拿林食完趕住開檯，就簡單的吃粥麵算數。叫了豬手撈麵、金華火腿齋鮑片撈麵及瑤柱響螺粥一煲，加碟菜。豬手撈麵最快上檯，豬手其實又是豬腳，皮多肉少，都炆得幾腍。南乳汁幾香，用來撈麵都不過鹹，不錯；金華火腿齋鮑片撈麵都幾有睇頭，金華火腿切絲，雖然不多，但鹹香亦幾夠味道，太座就嫌過鹹。齋鮑都勉強有彈牙口感，味道當然只是假味。其實撇開齋鮑魚，單是金華火腿撈麵都唔錯；瑤柱響螺粥一煲上，裡面滾到起泡，出面還是凍凍的，明顯是後期才入煲的。粥底都算綿滑，味精也不算很多，過得去。響螺只是貝蚌片，無咩味，不過好幾日無食過粥，食下都唔錯。幾樣食物份量頗大，加上兩個人吃三樣，差點吃不完。埋單百一蚊有找，都唔算貴，一試無妨。