韓膳宮 (已結業)

今日去咗旺角行街，喺旺角百老匯睇完戲搵啲嘢食下，朋友推介我喺附近有間韓燒放題，性價比好高，而且食物質素都唔錯，所以去試吓。韓膳宮韓國料理。餐廳環境都唔錯，地方都好闊落，加上全部都係卡位，坐得都幾舒適。坐低職員已經送上前菜，大豆芽，菠菜，泡菜，食韓國燒烤最重要嘅生菜，全部都係無限追加。新鮮牛肉，燒一陣已經可以食得，用生菜包住牛肉加啲泡菜一齊食，真係好正，牛肉味道好鮮甜，肉質好嫩滑，加上泡菜有少少辣味，口感同味道都好豐富。豬大腸，豬大腸燒到金黃色，入口味道好香，外層爽脆，雖然比較邪惡，但係真係好香口惹味。五花腩肉，五花腩燒一陣味道已經好香，原汁原味嘅五花腩，完全唔使醃製，脂肪同肉嘅比例好均勻，完全將油香迫咗出嚟，加上肉質新鮮嫩滑，真係追加左幾碟先夠喉，我自己就最鍾意包生菜食。醬燒雞髀肉，雞髀肉好入味，肉質好滑。柚子雞中翼 ，雞翼好肥美飽滿，燒香左嘅雞皮脆卜卜，入口特別惹味，雞翼入邊嘅肉質仲係好嫩滑多汁。薯仔片，呢個簡直係我最愛，薄切嘅薯仔片，燒到金黃色，加少少燒汁，食落去又香又爽脆，味道又好。$88特價放題，一個價錢75分鐘任食，性價比真係好高，最重要食物質素都好好。