亞越泰 (已結業)

週日中午去咗石門揾食，見呢間啲嘢幾啱口味，價錢都ok就入嚟試下。餐廳都幾滿座，不過咁啱最角落頭張枱啱啱起身埋單，起碼都叫做有卡位坐。餐廳午市套餐選擇都唔少，價錢就大概$60-$80，亦可以特價追加指定小食。因為小食唔太啱我哋，所以三個人叫三個餐，都只係追加咗一個小食試下。叫咗個海南雞飯套餐，個侍應話佢哋有兩款海南雞飯。喺香港通常係有三款醬點嗰種，而我哋就叫咗另一款(唔記得咗個名)只得一款酸醬嘅海南雞飯。套餐有埋餐湯(椰子雞湯)、前菜、甜品(糯米糕，不過唔好食)同餐飲(呢杯係無乜薑味嘅桂圓薑茶)。雞肉好嫩，個醬味道比較濃，油飯只有色但無油，似係黃薑飯多啲，反而幾好，唔膩。豬手飯套餐。豬手份量都唔少，不過好"鞋"口，得好辛苦；而且個汁有啲稀，感覺同豬手無連繫。香茅豬扒金邊河套餐，其實只係配一杯飲品，另追加泰式無骨酸辣鳳瓜。豬扒炸得好香口，唔油，美中不足係無切件上，食落有啲麻煩。加配嘅泰式無骨酸辣鳳瓜凍凍哋，正正常常，都幾辣。份量嚟講係夠飽。雖然唔係話極好味，而且今次試嘅豬手係唔得，不過都可以再試多一兩次、食下其他嘢。