J.moon

朋友介紹咗我去間樓上酒吧食tea，果然去到就覺得環境好舒適，氣氛一流，呢一間係以月亮為主題嘅酒吧，所以每一台都會有一個識發光嘅月亮做擺設。我同朋友嗌左一個小食同埋兩個主食，餐廳介紹呢個小食係炸黑松露risotto，我從來未試過喺其他餐廳試到呢一個咁特別嘅小食，果然冇介紹錯！食完呢個小食就輪到主食，我哋分別嗌咗肉醬意粉同埋招牌J.moon Pizza，首先講吓個意粉，一上枱就已經覺得佢賣相不錯，肉醬份量都唔少，每一條意粉都會沾滿醬汁，可以食得到蕃茄一粒粒，調味都唔錯，仲有鋪滿芝士粉，非常之開胃。而個Pizza係以餐廳名命名，所以事前唔知道係用咩配料，都會好想試吓，原來呢一個Pizza中間會有隻溫泉蛋，一拎起Pizza，個蛋黃就會流出來，賣相十分之得！Pizza嘅配料有紫洋蔥、紅椒青椒、菠蘿同煙肉，而Pizza嘅醬汁都十分之惹味，而且個餅底食得出係由師傅手工做，非常新鮮同好味！而飲品方面我同朋友都係嗌左Smootie，揀咗香蕉味同埋雜莓味，感覺清新，不妨一試！餐廳員工嘅服務態度十分之好，平日想搵個地方嘆吓過吓時間嘅，就不容錯過啦！