今次終於可以同個frd嚟食啦!入到去環境幾舒適，我哋係坐最入果啲4人枱，位置寬敞，同隔離枱都有一定距離，唔會太近，方便傾計，而且有落地玻璃，可以睇到街景。
打開Menu真係花多眼亂，好多未見過嘅菜式，所以都點咗啲特色菜!
扣肉包係逐片計嘅，我哋點咗兩片，個包exactly係台灣割包果種包，好軟熟，我勁鍾意食，扣肉甜甜地炆得好腍好入味，再配埋爽口新鮮嘅生菜一齊食，一啲油膩感都無，正!
冰鎮芥蘭就食得多，冰鎮苦瓜就第一次食!苦瓜切到好薄好晶瑩剔透!食落好爽口，而且食落一啲都唔苦，只係有苦瓜甘味，再點埋桂花蜜糖一齊食，味道勁似台灣蜂蜜苦瓜汁!無論點唔點蜜糖，都幾好食!
當歸燉雞湯，藥材味都算濃，而且幾足料，一盅用半隻雞燉，可以分到6碗!
見咖啡雞咁特別就試下，入口好香咖啡味，後勁會有啲苦，而且雞肉嫩，送飯一流，鍾意飲咖啡嘅人應該會鍾意食。
茘枝咕嚕肉，哩碟係唯一一碟有啲失望嘅菜，成碟咕嚕肉，我一舊茘枝都搵唔到，味道其實同普通咕嚕肉無乜分別。
三色桂花班蘭糕，由椰汁，班蘭，桂花糕組成，質地都算實淨，唔會一拮就散，椰汁同桂花味會比較濃，相對地班蘭味唔夠特出，雖然係咁，但都幾好味!
總括嚟講，我幾滿意哩間嘢嘅環境同食物質數，而且價錢合理，下次嚟一定要再試埋其他特色小菜。
