1
秀殿呢間隱世小店，座位大概十五個，裝修簡潔，吧枱座位可與日籍老闆及女廚師傾談飲食心德。老闆同廚師之前响附近開餐廳賣蛋包飯，當時人頭湧湧，坐無虛席。大半年前將餐廳結業，轉陣到現址賣炸串，客人八九成係日本人，老闆同廚師都操流利廣東話，餐牌中日對照，咁就唔駛驚點錯餸啦。
1
坐低第一件事就梗係揀酒先啦，燒酎，梅酒，啤酒，連紅白餐酒都有，燒酎梅酒個list有成十四板，上百個選擇，唔識嘅可以話老闆知你鍾意嘅口味，佢會盡力介紹。我同啲人先來一個House shochu，味道清爽，偏淡，易入口。另一杯茜霧島，帶點花香，用芋花酵母釀製，味道較烈。
有酒就點少得酒盜芝士呢，極軟滑嘅忌廉芝士，牛奶味香，唔會太搶，夾住鹹香嘅酒盜(鰹魚肝漬)，芝士中和酒盜嘅腥味，入口甘香，下酒佳品。
上炸串前，店舖供應椰菜片及味噌，客人可邊吃炸串，邊吃清爽嘅椰菜蘸味噌中和油膩感，廚師將麻油伴入味噌，甚具風味。老闆亦同時介紹炸串嘅蘸料，燒汁(sauce)，柚子汁(ponzu)同岩鹽。
好戲開始，第一道芝士火腿。鹹香嘅火腿夾住芝士一齊炸，邊有得輸! 熱騰騰嘅芝心軟滑，咬落去真係要好小心，芝心隨時煮熟你個咀。不過太好食，而且喚起兒時口味，邊度等得切攤凍呀。
煙肉包蕃茄，電視劇深夜食堂名物之一。脂肪平均嘅煙肉，比一般煙肉淡口，包住飽滿嘅車厘茄，入口爆漿，蕃茄味酸甜醒胃，為黎緊嘅美食作好準備。
新環境令我東張西望，眼尾睄到枝燒酎嘅招紙有個矇面超人咁款嘅嘜頭，咪問老闆咩黎。佢二話不說就倒咗啖我試，入口以為冇咩嘢，兩秒後，嘩! 辣椒味十足，仲幾好飲添，不過唔飲得多。
跟住就到和牛啦，年幾前响神戶享受過，今日再食依然興奮。牛肉有肉味兼且鬆化，滿口肉汁油香，一啲都唔膩，食多幾串都仲得。
接住落係紫蘇梅子雞胸，炸雞胸串上唧一行梅子蓉，上面灑紫蘇葉絲。紫蘇同梅嘅香味入口爆發，雞胸軟嫩到冇朋友，一向以鞋見稱嘅雞胸肉，竟然可以咁多汁咁冧，夾埋梅子嘅酸，味道同口感帶黎嘅刺激，直情係高潮。
1
帶子三文魚籽，賣相了得，難怪大多數客人都點呢個。大大隻炸到金黃色嘅元貝，肉汁鮮，一啲都唔腥，舖上帶子碎大根粒沙律，大大粒鮮艷奪目嘅三文魚籽，好想一口大快朵頤。可惜隻帶子真係太大舊，好難一口食哂，一咬就散開，影響食感。
炸日本蚝我都做過，但就始終好難做到，皮薄鬆脆，內裡多汁飽滿。滿以為自己做嘅都不過不失，經秀殿一個棒喝才知道自己自大。人家嘅除外脆內軟外，蚝汁被麵衣密密封好，一滴不漏，麵衣沒因蚝汁而濕軟，蚝身緊緊熟，半條筋都冇，蚝肉清甜，日後炸蚝都係出黎食好過。
呢個時候啲人示意酒杯已乾，係時候再來。為了滿足味蕾，我點咗一set燒酎(麥，芋，米)，三種味道分別很大，米燒酎味清且香，芋燒酎果香味甘，麥燒酎味濃且辣。
得三細杯邊夠我哋飲吖，俾我見到枝椎茸(冬菇)燒酎，我點會唔試呢，不過女廚師話昆布燒酎仲好飲，咁就要試試啦。果然冇介紹錯，昆布嘅umami同燒酎出奇地配合，回甘時可以清楚嚐到淡淡昆布味。
臨近尾聲，實情意猶未盡，食埋串軟糯嘅麻糬再叫過。明太子雞胸，同紫蘇梅雞胸差唔多，不過都係紫蘇梅好食啲。
鱚魚散發油香，入口溶化，魚味香甜。至於原條香魚(Ayu)，甜味更甚，唯內臟味太濃且腥苦，影響食味。
最後又點可以冇茶漬飯呢，炸串過後，來個梅子茶漬飯，油膩感盡消，幫助消化。
食後感: 炸串俾好多人嘅感覺係油膩熱氣唔食得多，但當炸串嘅材料，用油，温度都咁講究，出黎嘅炸串實在同炸三寶係天淵之別。而且日本人相信, 用麵衣包裹新鮮食材, 最能確保食物嘅原味肉汁得以全面保存, 麵衣亦能保護食材被免焦乾. 主廚會因客人食速而烹調炸串, 每串都新鮮熱辣, 非常細心. 經此一役，方知炸串有著非一般嘅學問。
