亞婆豆腐花

營業中

休息中

每次一到大埔不外乎做兩件事，一係就去群記食清湯腩，一係就去亞婆食豆花（再唔係就做晒兩樣）。今次到大埔有事做，順便就整番碗豆花，橫掂亞婆搬左舖後我都冇來過﹗外面仍然係排住一條人龍，仍然係亞婆親力親為同幾個後生仔一齊賣。經濟唔好，但亞婆都冇成乘機加價，仍然係$5一碗，外賣$6。所有野都好似冇變，最後睇下味道有否改變先。豆腐花食熱一直係小弟的態度。雖然天氣熱，但係始終熱的較滑，而且可以落黃糖，較糖漿更香。豆腐花同以前一樣仍然很滑很滑，係我食過最滑的豆腐花。豆味食到啲，但不算特別香，但加上黃糖後好快就在食晒成碗，好爽﹗之前睇電視見到教整豆腐花，話豆漿煮熱後加上魚膠粉就得。啲騎呢主持人仲話滑過出面個啲，但其實加魚膠粉咪只不過係豆漿味啫哩，應該唔會係真正用石膏粉的豆花的質感。同埋如果真係咁易整，好的豆腐花就唔駛咁少地方有了，所以話大埔的亞婆絕對唔係一般的亞婆。慶幸自己搵到一間咁出色的豆花，仲只係$5一碗，絕對係我的最愛豆花。