Iberians (已結業)

同朋友仔慶生，嚟咗呢間西班牙餐廳。入面環境好靚，好有氣氛，好啱嚟慶祝生日/ 紀念品日。而佢地嘅碟都好靚，好有藝術感。食物就叫咗個西班牙海鮮飯（細）、一個繪牛仔排、一個加西利亞章魚、一個巴馬火腿配哈蜜瓜、同埋一個香蒜牛油大蝦。我地去嗰陣時好肚餓，D食物都要等一段時間，應該都有15分鐘，所以去到就好快D揀好嘢食喇。食物呢，香蒜牛油大蝦都幾好食；巴馬火腿配哈蜜瓜正常發揮；加西利亞章魚就最特別，好少食到咁樣嘅配搭：薯仔＋章魚＋少少沙律醬之類嘅嘢，味道幾夾；繪牛仔排係一個主食，不過份量就少D，有D似紅酒繪牛肉，同想像中嘅「牛仔排」有出入；而個西班牙海鮮飯就賣相好靚，好啱打卡。不過味道就一般，食得出佢上面嘅海鮮都係好普通買到嘅急凍海鮮，以2百幾蚊價錢嚟講就略嫌有點貴。而佢嘅其他主食平均都要百幾二百蚊。不過喺呢間餐廳就真係食環境同氣氛。因為朋友生日所以有再叫一個甜品拼盤，朋友好開心，係一個愉快嘅晚上呢。