名 料理 (已結業)

聽朋友講，大美督附近有個幾新好靚嘅沙灘，雖然暫時未開，但都可以觀賞一下。去沙灘既同時，附近亦都有朋友推介的美食，所以就試試佢啦。首先，叫咗三款磯燒海鮮，包括鮑魚、牛油蟹子扇貝、響螺。唔知係咪近海既關係，食落好新鮮，即燒即食，好好味。牛油扇貝好入味，濃濃既香味配埋蟹子食落好爽🤤。響螺同鮑魚都食得出係原汁原味，無太多額外嘅調味料，已經好好食😋。除咗磯燒之外，日本野點少得壽司🍣，呢度既壽司種類都唔小，今次就叫左海膽軍艦、海膽帆立貝、黑松露三文魚、吞拿魚壽司，海膽大大舊食落好滿足，帆立貝鮮味夠，三文魚吞拿魚都在水準之中，唔錯。串燒方面，雞軟骨串同羊架就係我既至愛，黎到大美篤點都要食下燒烤。雞軟骨好爽脆，佐酒一流。羊架今日燒得好好，羊肉半肥瘦，燒完羊的香味四溢，食落去羊味又夠，推介推介！接近尾聲就不如叫多個海膽炒飯，海膽既份量唔小，飯既份量極多，性價比好高既炒飯，仲有其他不同種類的海鮮。最緊要係佢地炒既飯唔油又唔重口味，食落好健康，岩晒呢一代注重健康既各位。最後以芝麻雪糕作結，芝麻味重，雪糕真係夏天既至佳甜品。