凱柏冰室 (已結業)

突然又落雨，天氣又凍番，冇心情煮飯，落去樓下食啦，食茶餐廳都好，快靚正！好，坐低睇吓有咩好食先。牆身上面有唱片，落地玻璃出面仲見到海景，飲品就叫咗凍檸茶同凍華田。咖喱牛腩煲，上枱嘅時候啲汁仲煲緊，夠晒熱。牛腩每條都好粗，炆得好腍，仲有好多舊薯仔，薯仔係炸過嘅，食落好香，跟白飯，正。熱石鐵板燒，呢個扒餐夠晒份量，可以揀兩塊扒，啱晒食肉獸，本身已經有粟米、薯條跟埋意粉，蕃茄汁拌意粉，一啲都唔乾，成份餐大胃王都夠飽。