滾喜火鍋專門店 (已結業)

成日都食火鍋放題，萬變不離其宗，嘢食選擇特別多。但係講到用心，呢間滾喜做得幾出色！坐落喺女人街，價位抵食，$198已經係任飲、任食雞煲同埋火鍋。 想食靚啲嘅牛，每位加多$20就有安格斯牛肉。鮮紅色夠新鮮，唔係雪咗好耐嘅千年肉，牛肉味濃郁，油脂亦平衡。雖然係任食，但係擺盤認真！未試過一間火鍋放題係會將蝦嘅大顎、觸角都剪晒佢，每隻去做好花時間，最後仲要排到靚靚上枱！ 你見過未？鹹蛋炸魚皮、鮮蝦雲吞都係自家製，魚皮新鮮香脆有啲鹹蛋味；雲吞用料十足，入面仲有蝦肉。落單多數都係以件數計，唔怕浪費。 落幾多就嚟足幾多，完全係啱數，唔會話貴嘢落幾多都係俾少少你，平嘢就大碟大碟上。我推介必食鱔片，大大片起雙飛厚切，新鮮嘅程度就好似喺街市啱啱買返嚟咁爽脆，好驚喜！ 寫幾多片就嚟足幾多片，絕無手軟。平時好鍾意鱔嘅我，去街市買半條白鱔成百蚊都係得十片左右，呢度係任叫呀，超值！鵝腸洗得乾淨又大條，爽口好味道！西班牙黑豚肉亦相當高質。火鍋前嘅雞煲，我哋揀咗三重芝士雞煲，爆多芝士，加埋紫洋蔥爆炒，香味四溢。食完仲可以再加呀！成晚食飽飽，每人$240咋！