天晴茶座 (已結業)

很少寫食評，因為怕寫得唔中肯影響到人嘅生意。但係今次真係忍唔住要寫寫食後感！！星期六（2 Jan 2016) 當天陪女朋友到天晴上堂，因為遲起身很趕時間，所以我哋決定到達目的地先搵嘢食。到達後發現上堂嘅地點附近（天晴社區綜合服務大樓）只有一間食店，我抱著好又一餐、唔好又一餐嘅心態就去試試啦。但估唔到雖然食嘅係簡單嘅茶餐廳食物，令我咁起出望外！首先，講講進食環境，座位設在戶外露天嘅地方，感覺好舒服、好relax(本身好鍾意露天茶座）。食物方面，一定要推介香茅雞翼 ，即叫即炸、外脆內軟、保持到有肉汁、唔会乾柴柴。香茅味十足。第二推介-粒粒西多士 ，感覺好新鮮、好脆口，唔會油淋淋，因為好多時食啲西多士都滲透晒啲油，有時仲有油溢味。所以食到好食嘅西多士並唔容易。特別推介-咖啡 ，一向都喜歡飲咖啡，有一定要求。哩間茶座嘅咖啡好甘香、好濃厚（不帶酸），並唔似一般茶餐廳，抵讚！有讚必有彈，今次令我失望嘅係餐旦丁嘅餐肉煎得唔夠香（好似上一篇食評所講一樣）。整體而言，今次咁簡單嘅一餐真係令我喜出望外，值得推介。