牛角日本燒肉專門店 (又一城)

營業中

休息中

食牛角夜市，期望越大，失望越大。劣中極品：零雪花巨筋日本和牛唔同鋪頭，唔同日子，肉嘅質素真係可以爭好遠。錢就都係收咁多，但今日啲和牛真係別出心裁。首先係視覺衝擊，色水深，無油花，得條巨筋；燒緊嗰陣，反兩下，條巨筋就將舊肉一分為二，大開眼界；擺入口，味道都係其次，考驗牙鉸耐力先係重點，凡人都係無法戰勝巨筋之力，只得囫圇吞下。和牛雙姝：半斤八兩美國牛其實都真係乏善可陳，無論係賣相同劇情走向都同上面日本牛相若。兩碟（所謂）和牛就好似copy and paste，難辨雌雄，係個身份證有些許出入，唔知係師傅的疏忽，定係命運的玩笑。堅挺小深紅：冰雪肩脊肉今日啲肉色水都偏深。肩脊肉之所以突圍而出，就在於佢附送幾絲冰花。夾落堅挺不屈，幾分鐘前可能仲係擲地有聲。不多言了。你很好只是錯timing：姍姍來遲梳打肉類不如人意既成事實，自己嗌嘅野，點都要食落去。落單後，幾碟肉好快魚貫而至，但，杯野飲嗌咗超過廿分鐘先嚟。食巨筋牛都真係好想有啲嘢飲撫慰下，一路燒一路等一路呻，結果幾近食完先嚟。最後要硬隊大半杯嘢飲，足氣梳打與滿腹怨言混合，一同發酵。好一餐豐富的晚飯。千思萬緒無處解，聊作記錄，與眾分享。