新南苑私房菜火鍋鷄煲 (華僑商業中心) (已搬遷) 新店位置

呢間餐廳數年前因為同學聚會而首次認識，之後不定期都會去幫襯吓，近排社交平台見到佢做埋10月唔做（黃大仙分店仍會運作，但就冇火鍋得小菜），決定把握最後時間再食多次。餐廳主要提供3款套餐（海鮮、牛魔王、至尊），今次揀咗海鮮餐（7：30前離座 $258，免加一）。飲品自助出去拎，款式唔算多，但基本汽水、茶、果汁都有。另外仲有幾款餐前小食，螺肉、酸辣雞腳、泡菜、麻辣豬皮魚蛋鴨紅、炸雞翼、炸芋頭波。食緊餐前小食期間，雞煲都炒香了（要咗BB辣），加埋油炸鬼落去兜兩兜，食得。雞煲尚算濃郁惹味，但油多咗少少（但食得雞煲都預咗啦）。食完雞煲換湯底打邊爐，因為今次只得兩位，冇得揀湯底（因為食咗雞煲，或者要三人以上先可以揀湯底），預設係蕃茄粟米湯底。跟住上海鮮併盤，有蟶子、鮑魚、青口、虎蝦、生蠔、脆鯇片。海鮮好新鮮，唔錯。另外仲有一碟本地手切牛頸脊，有八片，切得有啲厚度，牛味濃，肉質嫩，好味道。其他食物就剔紙仔，首推龍躉片，食得出係新鮮的，有魚味又彈牙有口感。其次係小籠包，雖然皮比較厚，但因為厚所以唔易穿，所以入面仲有肉汁，幾得意。其他就係一般嘅火鍋配料，味道正常。最後甜品係牛乳奶凍，微甜香滑，用嚟結尾不錯