二鍋頭 (嘉芙中心)

營業中

休息中

尖沙咀想搵一間任食又抵食嘅火鍋店真係唔容易，但係最近就新開左一間，地點近尖沙咀同埋尖東站嘅中間，兩邊去都比較方便。首先坐低之後可以揀食雞煲，鴨煲或者豬手煲，食完呢樣仲可以食果樣，適合三心兩意嘅朋友仔，我哋就揀咗食雞煲，仲叫多芫荽，小辣係非常香辣，而且啲雞好惹味，算係幾滑。食完之後仲可以自選湯底，同出面唔同，好多餐廳打完邊爐就加清湯，但係呢度有得揀口味，唔使另外加錢，我哋就揀咗藥膳湯底，一擺到上嚟就見到有啲紅棗杞子及藥材，聞落去都好香。食物方面，除咗落單嘅海鮮、肉類之外，出面都有好多蔬菜及丸，仲有平時唔係周圍都有得食嘅雞子，大大粒都幾有質素！牛柏葉、鵝腸同樣有得食，夠晒爽口！豬、牛、羊幾款肉都有，質素絕對對得住價錢，羊就酥味比較重，如果鍾意食濃味嘅話就真係好啱。海鮮方面又有墨魚滑，蜆，脆鯇～ 墨魚滑都幾彈牙，啲蜆有好多，質素都唔錯！另外出面仲有好多嘢飲同埋雪糕，選擇好多，細細樽嘅清水都一樣有。