名館 (黃埔天地) (已結業)

黎到黃埔，唔知食咩好，直接上美食坊大把可以揀。見名館呢間餐廳菜式吸引，價錢實惠，即管俾次機會佢。餐廳座位寬敞，有卡位，枱與枱之間空位好夠。可惜今晚太多人，我又唔想等，唯有坐自閉位面壁思過我見差不多每枱都叫金黃泡飯，我都唔蝕底叫返一客。仲叫左賣相唔錯嘅蜂蜜柚子蝦球，仲有上海x東瀛嘅和麻醬雞絲粉皮，廣東嘅代表點心天鵝酥同蒜蓉蒸勝瓜。金黃泡飯嘅飯球炸得好金黃，外面脆脆，裡面嘅白飯配以清甜嘅湯底，非常好味。蜂蜜柚子蝦球感覺好清新，柚子帶酸嘅味道中和了炸漿油膩嘅感覺，蝦球好爽口彈牙，但略嫌炸漿厚了一點。和麻醬雞絲粉皮嘅粉皮好特別，比一般嘅較粗，口感更豐富。天鵝酥造型好特別，3隻天鵝在雀巢裡，好有意境，入面唧紫薯又唔會太甜，外面又唔會太油膩，估唔到色香味都兼顧到。