好包 (已結業)

今日發現到一間位於鬧市既隱世小店想推薦比大家，呢間餐廳專門食意大利拖鞋包三文治，我食完都覺得好有驚喜㗎！我今次叫咗秘製慢煮豬腩肉包同埋青咖喱無骨雞翼包，另外叫咗杯菠蘿青檸蜜氣泡飲試吓。估唔到佢嘅豬腩肉包真係好驚喜，豬肉用上肥瘦均勻嘅五花肉，食落口肉質淋而且無騷味，配合醃咗嘅子薑同埋爽脆洋蔥青瓜口感有層次，加上佢哋秘製佢醬汁好香濃唔會太咸，仲滲透入麵包入面超級入味。青咖喱口味偏辣充滿泰式風味，雞翼方面用上無骨雞翼啖啖肉好爽，最令我驚喜嘅係佢哋自家制意大利拖鞋麵包，香脆嘅外皮配合超鬆軟嘅麵包，每一口咬完之後都會見到個麵包好似海綿咁樣回彈力十足，打破左我以為拖鞋麵包一般偏硬既感覺，我個人超級鍾意！飲品方面我覺得佢哋都好有誠意㗎，絕對唔係就咁買市面上嘅濃縮糖漿就咁做出嚟，菠蘿青檸蜜其他有冇一啖飲落去都有果肉，入口唔會好酸但係好清爽，絕對唔係溝出嚟嗰種死甜味，最啱就係而家呢個天氣飲透心涼，大家有興趣就去試吓啦。