皇子印度餐廳 (海富樓)

營業中

休息中

親友介紹下黎到呢間地點較隱蔽的印度餐廳，餐廳較細，只能容納約30人，要大枱的話要預早一點攞枱，今次我地10人，6點半家人都到齊，先上餐前小食胡椒薄脆，熱辣辣好重胡椒味好脆，但味道偏咸。蕃茄湯，有香草，味道偏淡，可以落d 薄脆加咸，哈哈…蒜蓉炒雜菜，d菜好爽甜，醬油炒得好惹味。咖哩角，個皮非常鬆化，入面有滿滿既咖哩薯仔，夠香口。薯仔沙律，有青瓜蕃茄椰菜，用酸甜既醬汁混合，好開胃，好清爽，叫左咁多烤肉，一定要叫呢個平衡一下味蕾，正!串燒雞，份量好多，鐵板熱辣辣上枱，用乳酪醃過再混上紅椒粉烤焗，肉質變得更鬆化，保留到肉汁同嫩滑口感。烤羊架，用香草醃過，好入味，肉質夠嫩，油脂味較羊仔柳重。烤羊仔柳，呢個絕對有驚喜，份量多到震，淡淡肉，肉質爽滑，肉汁非常多，必食推介!咖哩羊肉，咖哩味香濃，羊肉夠稔，羊脂膻味較烤肉重，但配可無限添加既千層薄餅，非常合襯。芝士薄餅，包住厚厚可以拉絲既芝士，非常邪惡之物。以上全部叫左雙份，10個人 1300蚊，價錢可以話非常合理，下次會再舉家幫襯。