Brick by Brick (已結業)

位於中環蘇豪區的Brick by brick經常都係擠滿人。今晚呢間位處小巷，地方細細嘅馬來西亞餐廳同樣座無虛席。泰式酸辣無骨鳳爪算係唔錯嘅開胃小菜。入口有小小軟骨、味道酸酸甜甜，加埋紅蘿蔔絲、生菜同蕃茄仔，十分醒胃。招牌菜係秘製馬來西亞咖喱叻沙湯麵。之前已經試過雜錦海鮮，今次就試吓珍寶大蜆拼海蝦。咖喱叻沙湯底濃厚、微辣帶點椰香味。2隻大蝦新鮮肉爽、6隻大蜆身厚無沙。配料有半隻流心蛋同爽口芽菜，加埋吸滿湯嘅豆卜，份外滋味。除咗叻沙外，火熱砂煲香濃肉骨茶都係老闆娘大力推介嘅無添加無味精之選！湯底有淡淡藥材味；豬軟骨夠琳夠入味，加埋由原個蒜頭打成嘅蒜泥一齊食，味道特別香。除咗白飯之外，仲有油炸鬼同手工蒜香米餅，令呢個肉骨茶更加特別。雖然店仔小小，但真係食到廚師嘅心思同手藝；亦感受到老闆娘用心招待每一位客人嘅熱情同誠意。