一風堂 (朗豪坊) (已結業)

香港人就係鍾意食日式拉麵，你見各大品牌拉麵店之前都在香港開店，你就知啦。一風堂同豚王係比較可以比較嘅兩間，因為佢地分店多、價位相近、拉麵款式亦係以五六款經典加上每日限定或者期間/分店限定作招徠。我個人而言，兩間嘅湯底同麵條都啱我口味，一風堂比豚王就勝在麵嘅粗幼有多幾個選擇。今次去到旺角分店，我叫咗3款小食同埋店鋪限定嘅「奉天黑醬油拉麵」。個人而言，奉天醬油的確做幾剛剛好，味道鮮濃而又唔會膩，因為湯底質感唔會有豬骨濃湯嘅稠密，令你每一口食完，你都會覺得仲有空間食多少少。麵條亦容易沾上醬油香。整體都好食，深信我會再encore 食多次。但三款小食就比較普通同埋失望，我叫咗芥末蝦mix 牛油果，呢個組合好穩陣同埋不過不失。IFC 炸雞就炸得比較乾身同堆柴口咁，真係豪大大雞排嘅$30三隻好過佢。黑松露餃子，餃子嘅口感好穩陣不過不失，但係黑松露係來自個醋汁，當個餃子沾上醋汁時，黑松露味大減.....令到呢個菜式有啲失色。希望以上資料可以比大家做個參考啦。