一入去, 見到收銀檯的懷舊收音機, 頓時令我對"雷公子"產生興趣, 店內燈光充足, 而且地下都好乾淨, 好驚食海鮮既地方, 個地濕淋淋, 老闆見我一行六人, 先來每一人碗例湯
呢到用上懷舊的"雞公"圖案碗匙, 低調中有的不平凡
今晚係合掌瓜豬骨湯, 真材實料, 飲下去唔覺有味精, 起碼飲完冇口乾乾先啦!
頭打陣係"杜康醉酒瀨尿蝦", 隻瀨尿蝦以size來講(一碟之長), 都幾大隻下! 一問之下才知杜康是酒, 上檯後先聞到酒香, 還有瀨尿蝦很少會用酒去烹調, 用酒去煮的食物, 稍一控制不妥, 就會有反效果, 很佩服佢地富創意敢挑戰的勇氣
瀨尿蝦中間部份, 店方已貼心去殼, 經蒸熟的蝦肉仍然保持肉質鮮嫩, 同時食落有淡淡酒味, 正!!
如果覺得偏好重酒味, 旁邊會另上一碗花雕酒, 可沾瀨尿蝦一齊食, 實滿足食客的需要
海鮮有蝦, 又點少得蟹呢!!! 避風塘金沙炒蟹, 油炸過後, 蟹肉外脆內鮮, 味道唔錯, 始終都係熱氣野, 還是一大班人share食就棒
因乜事食到要玩火呀?(家長指引) 呢道銀山火焰桶蠔, 上檯時是用鍚紙包著, 由店員饌上玫瑰露酒, , 火焰嘩嘩嘩來啦!! 當玫瑰露酒揮發後, 火焰會隨之熄滅的
油炸後的桶蠔, 仍能保持肉厚肥美, 也沒有腥味, 而帶酒香的洋蔥汁令桶蠔增添不少分數喔
龍蝦伊麵食得多, 今次係菠菜麵 (可轉烏冬或粗麵的), 而個底係椰汁, 內裡有很多椰絲肉, 食落唔漏,
但椰汁底跟菠菜麵像不太搭配, 加上菠菜麵只見其色而沒其味, 有點失色吧!
之後就到此店獨有的立體3D芥蘭, 未上檯前, 我跟朋友還猜想會否把芥蘭搭成屋仔添(哈哈~), 要怪我想像力太強吧! 3D其實係解作三層, 最底是芥蘭菜柄, 中間是炸過的芥蘭葉, 脆卜卜好得意的口感, 最上層是炒過的肉碎, 香口少辣, 超惹味, 唔該六個"靚仔"(白飯)丫, 撈飯食真係冇得輸
黃金蝦, 是朋友想點的, 賣相唔錯呢~炸得甘香, 咸香味有點偏重
幸好蝦肉還可以, 至於伴在黃金蝦下的粟米, 猜想是令黃金蝦能放穩在碟上的原故
身為中國人, 晚餐冇半點米氣, 硬係未夠完滿, 最後由闊少炒飯作為今餐的句號, 是蛋白粉飯, 偏清淡的一款, 味道也蠻不錯的喔
食咁多款既海鮮, 每人消費也只是三百元左右, 比起入去"老連"咁遠既地方食, 抵食得多. 更可省卻車程時間("老連"地方分分鐘, 一來一去至少兩小時以上), 以後在市區都可以食到靚海鮮, 識食既你, 記得要book位呀!
