朋友經歷幾個月在家工作嘅日子後，終於要回歸辦公室返工🤣，所以星期五我哋又可以約食晏喇！我行近佢嗰邊食，大家都想食心點(小新叫法)，於是就去咗「馬師傅菜館」食食🥢。
呢度有點心食，亦有比較經濟嘅炒粉麵午餐，選擇唔少嘅，所以都見到成群結隊嘅打工仔嚟幫襯。點心方面，好多款式嘅單位數量都係以兩粒為主，啱哂兩個人嚟幫襯，可食多幾款✌🏻。
馬師傅鮮蝦餃($20/2粒)，蝦餃大大粒，水晶餃皮厚薄適中，蝦肉彈牙。
蟹籽燒賣皇($20/2粒)，燒賣賣相唔錯，面頭有大大隻蝦同蟹籽，豬肉同蝦肉餡比例啱啱好。
山竹牛肉球($18/2粒)，牛肉球超巨型，就算得兩粒，都要用大蒸籠先夠放。另外，我好鍾意佢有勁多腐皮。
鮮蝦腐皮卷($18/2件)，腐皮卷即叫即炸，外皮酥脆，入面同樣係塞滿新鮮蝦肉餡，配埋喼汁食，好味道！
五柳炸雲吞($18/2件)，好耐無食過呢款點心喇，好有懷舊酒樓嘅味道。炸雲吞皮好爽脆又唔油，沾埋甜酸汁食無得輸。
味菜燒鵝絲炆米($68)，炆米味道唔錯，燒鵝絲份量幾多，另外仲有唔少配菜，包括三色椒、芽菜同韭黃等。當中菜名所述嘅「味菜」即係鹹酸菜，佢無想像中咁重口味，仲能提升炆米粉嘅口感。不過留意返，炆米係一人份量，多人Share食就未必夠分。
是日燉湯係木瓜雪耳燉豬展湯，湯品熱辣辣，用料幾足，感覺好潤，最重要係無落味精，飲完唔會口乾。
總括嚟講，喺長沙灣區想食點心小炒的話可以考慮嚟試下，價錢唔算平，不過質素OK👌😄，而且店員們亦幾有禮。餐廳收午市茶介$8位，但就全日免收加一服務費。
